Lajmet e fundit
Kryeministri në detyrë, Albin Kurti, ka reaguar pas vërshimeve të shumta që kapluan disa komuna të Kosovës pas shirave të dendura gjatë ditës së martë.
Ai ka bërë të ditur se aktualisht situata është nën kontroll, derisa shtoi se përveç dëmeve materiale, , fatmirësisht nuk ka raste të lëndimeve serioze.
Përmes një postimi në Facebook, Kurti tha se të martën gjatë gjithë ditës, në mbrëmje dhe gjatë natës, ekipet e agjencive të Ministrisë së Punëve të Brendshme dhe Ministrisë së Mjedisit, Planifikimit Hapësinor dhe Infrastrukturës, përfshirë edhe ministrat në detyrë, Xhelal Sveçla dhe Hysen Durmishi, siç thotë ai, kanë qenë në terren për të përcjellë situatën e rënduar nga vërshimet dhe për të bërë ndërhyrjet e nevojshme, si dhe për të mbështetur institucionet lokale në evakuimin e banorëve nga zonat e rrezikuara.
Nga ana tjetër, Kurti bëri të ditur se edhe ministri në detyrë, Elbert Krasniqi ka komunikuar dhe ka qenë në kontakt me kryetarët e komunave më të prekura nga vërshimet.
Sipas kryeministrit në detyrë, Forca e Sigurisë e Kosovës ka vendosur gjatë gjithë kohës në gatishmëri njësitet e saj, ka mbajtur kontakte me shtabet lokale emergjente dhe në Gjakovë ka mbështetur autoritetet lokale dhe qendrore në evakuimin dhe vendosjen e familjeve të rrezikuara.
“Në përballje me vërshime, vëmendje e veçantë i është kushtuar edhe ruajtjes së infrastrukturës kritike”, ka shkruar ai në Facebook.
Ndërkohë, sipas raporteve të deritanishme të Agjencisë së Menaxhimit Emergjent, komunat e prekura nga vërshimet e djeshme janë: Fushë Kosova, Lipjani, Obiliqi, Drenasi, Podujeva, Shtimja, Graçanica, Prizreni, Suhareka, Malisheva, Rahoveci, Mamushë, Dragash, Mitrovica, Vushtrria, Skenderaj, Klina, Istogu, Juniku, Deçani dhe Peja.
“Ekipet operative vazhdojnë të jenë në terren, duke monitoruar gjendjen dhe duke qëndruar në gatishmëri të plotë”, tha Kurti.
Po ashtu, kryetari i VV-së bëri të ditur se gjatë natës është intervenuar në shumë lokacione ku ka pasur rrëshqitje të dheut dhe gurëve, si dhe në zona ku janë bllokuar pusetat.
“Kompanitë përgjegjëse vazhdojnë të jenë në gjendje gatishmërie”.
Në fund, ai falënderoi të gjitha ekipet emergjente që iu dolën në ndihmë qytetarëve të vendit.
“Falënderoj zyrtarët e agjencive shtetërore, ekipet profesionale të zjarrfikjes dhe shpëtimit dhe institucionet e sigurisë për reagimin e tyre vetmohues dhe në shërbim të qytetarëve. Falënderoj qytetarët për solidaritetin e treguar ndaj njëri-tjetrit dhe për bashkëpunimin me institucionet përgjegjës, dhe u bëj thirrje që të vazhdojnë t'i ndjekin me vëmendje udhëzimet e institucioneve publike deri në tejkalimin e plotë të gjendjes së shkaktuar nga vërshimet”, shkroi ai.
