Përfundon me sukses ‘Turneu i verës’ në Prishtinë

Ka përfunduar me sukses ‘Turneu i verës’ në Prishtinë me lokacion i cili doli të jetë ideal në lagjen Ulpiana. Ekipi me emrin Mercedes Geti tek seniorët dhe KF Ramiz Sadiku tek grumposhat U11 dhe U13 kanë arritur të fitojnë edicionin e tetë të “Turneut të verës” që organizohet nga Prishtina Football Tournaments. Të premten mbrëma u zhvilluan ndeshjet finale në kuadër të edicionit të tetë të “Turneut të Verës”, nën një atmosferë impozante në terrenin e Ulpianës, transmeton Klankosova.tv. Fillimisht u zhvillua një ndeshje revyale nga personat e shoqatës “Down Syndrome Kosova”, teksa pastaj luajtën grumposhtat e reja si U-10, U-11, U-13 dhe në fund Polica e Kosovës ndaj Ambasadës së Amerikës. Pas këtyre takimeve, nga ora 21:00 u zhvillua finalja e madhe mes ekipeve Mercedes Geti dhe Batllava, e cila fituesin e dha vetëm pas ekzekutimit të penalltive. Më të saktë në penallti ishin lojtarët e Mercedes Getit, të cilët në fund iu gëzuan triumfit në edicionin e tetë të “Turneut të verës”. Pjesë e kësaj ekipe ishin emra të njohur të futsallit në Kosovës, si Behar Topalli, Muhamet Rakovica, Blendi Gashi, Adhurim Bekteshi, Egzon Hasani dhe Diar Ahmeti.