Për dallim nga Anglia, Spanja kërkon nga Izraeli që të respektojë urdhrin e GjND-së

Qeveria spanjolle kërkoi të shtunën që Izraeli të zbatojë urdhrin e Gjykatës Ndërkombëtare të Drejtësisë për të ndaluar menjëherë bombardimet dhe sulmet tokësore në Rafah.

Spanja theksoi se vendimi i të premtes nga Gjykata e lartë e OKB-së  ishte ligjërisht detyrues.

“Masat paraprake të përcaktuara nga GJND-ja, duke përfshirë që Izraeli duhet të ndërpresë ofensivën e tij ushtarake në Rafah, janë të detyrueshme. Izraeli duhet t'i respektojë ato," shkroi ministri i Jashtëm spanjoll Jose Manuel Albares në X.

“E njëjta gjë vlen edhe për armëpushimin, lirimin e pengjeve dhe aksesin për ndihmë humanitare [në Gaza]”, shkroi ai, duke shtuar se “vuajtjet e popullit të Gazës dhe dhuna duhet të marrin fund”.

Spanja është një nga vendet evropiane që ka qenë më kritike ndaj Izraelit lidhur me luftën në Gaza.

Të mërkurën, Spanja, Irlanda dhe Norvegjia thanë se qeveritë e tyre do të njohin një shtet palestinez nga java e ardhshme.

Qeveria britanike ka kritikuar Gjykatën Ndërkombëtare të Drejtësisë për urdhrin e dhënë që Izraeli që të ndalë menjëherë ofensivën në qytetin Rafah.

Anglia këtë vendim e kundërshtoi me arsyetimin se kjo do të forconte më shumë pikëpamjet e Hamasit.