Peleshi i kërkon NATO-s t’i trajtojë faktet e sigurisë në Kosovë në mënyrë të ekuilibruar dhe realiste

Ministri i Mbrojtjes i Shqipërisë, Niko Peleshi, mori pjesë në Ministerialin e ministrave të Mbrojtjes së vendeve të NATO-s, të zhvilluar në Bruksel. Në një njoftim të bërë në faqen e tij në Facebook, Peleshi tha se qëndrojnë fuqishëm në mbështetje të Kosovës dhe rrugës së saj drejt integrimit euro-atlantik. Ndërkaq, u kërkoi homologëve që situatën e sigurisë në Kosovë ta trajtojnë në mënyrë të ekuilibruar dhe realiste. “Të qëndrueshëm në mbështetje të Kosovës në rrugën e saj të integrimit euro-atlantik dhe kërkojmë trajtim të ekuilibruar dhe realist të fakteve mbi dinamikat dhe zhvillimet e sigurisë atje”, deklaroi ministri shqiptar, raporton Klankosova.tv. Ai tha po ashtu se Shqipëria e vijon angazhimin ndaj Aleancës, duke konsoliduar buxhetin e mbrojtjes me 2.03% të PBB-së. “Një pjesë e madhe e këtij kontributi do të investohet për modernizimin e armatimeve dhe pajisjeve të Forcave të Armatosura. Gjithashtu ambicia jonë është që të prodhojmë produkte ushtarake #MadeInAlbania brenda vitit 2030”, deklaroi ministri Peleshi. Po ashtu, gjatë fjalës së tij, ministri Niko Peleshi u fokusua në situatën e Mbrojtjes dhe të Sigurisë në Ballkanin Perëndimor, të cilën e konsideroi të brishtë dhe jo të qëndrueshme. Sipas tij, “Kuvendi Gjithëserb i mbajtur në Beograd disa ditë më parë, është shqetësues për narrativën lidhur me pretendimet territoriale të ngritur prej tij, si dhe gjuhën e përdorur ndaj aleatëve perëndimorë”. Në fotot që ministri Peleshi i ka publikuar në Facebook, shihet se i njëjti ka zhvilluar një bisedë edhe me Sekretarin e Përgjithshëm të NATO-s, Jens Stoltenberg. /Klankosova.tv