Pediatria e re 40 minuta pa rrymë? Nëna ankohet se u desh intervenimi i policisë që KEDS të vepronte

Një situatë shqetësuese ngjau sot në në Qendrën Klinike Universitare, ku saktësisht në Pediatrinë e re, për 40 minuta nuk pati energji elektrike. Kështu bëri të ditur për Klankosova.tv, një nënë në kushte anonimiteti, e cila e ka fëmijën me intubim në trajtim e sipër aty, ku sipas saj për aq kohë nuk funksionuan as gjeneratorët. "Më është dashur të alarmoj për këtë rast. Unë e kam fëmijën tim të intubuar aty dhe siç e dini pa rrymë pajisjet nuk funksionojnë, as 1 orë s'e mban pa rrymë". Madje ajo pohoi se u desh me patjetër intervenimi i policisë, në mënyrë që gjithçka t’i kthehej normalitetit nga kjo situatë, transmeton klankosova.tv. "E kemi thirrur edhe KEDS-in, por ata nuk përgjigjeshin. E kemi thirrur më pas policinë edhe përmes tyre e kemi thirrur KEDS-in. Tek pastaj, pasi e kemi alarmuar situatën, kanë reaguar edhe rryma është lëshuar". "Çdo herë në këso raste po duhet me reagu që pastaj këta me vepru", u shpreh ajo për Klankosova.tv. Klankosova.tv ka provuar të kontaktojë me personat kompetentë lidhur me këtë rast.