Pas vendimit të Kushtetueses për ligjin për çmimet tavan, caktohet marzhë tregtare për naftën

Pas vendimit të Gjykatës Kushtetuese për ta shpallë të pavlefshëm ligjin për çmimin për produktet bazike, Ministrja e Industrisë, Tregtisëe dhe Ndërmarrësisë, Rozeta Hajdari, ka nënshkruar vendimin për caktimin e çmimit dhe masave të tjera për naftën. Sipas saj ky vendim ka për qëllim parandalimin e çrregullimit në treg me çmimet e naftës, sidomos, sipas saj, gjatë muajit të festave të fundvitit kur bashkëatdhetarët janë në atdhe, e gjithashtu me qëllim të mbrojtjes së konstumatorëve, konkurrencës dhe për të mënjanuar çrregullimet tjera në treg. “Nga monitorimi i rregulltë i tregut të produkteve të naftës përmes Inspektoratit Qendror të Tregut/ MINT, me evidencë ditore për çmimet e shitjes me pakicë të produkteve të naftës dhe bazuar në evidencën ditore të pranuar nga Dogana e Kosovës/ MFPT, lidhur me çmimet e furnizimit/importit të produkteve të naftës, është evidentuar mospërshtatje e çmimeve vendore krahasuar me lëvizjet e mëdha me ulje të çmimeve në tregun botëror, çka përbën bazë/shkas për rregullimin e çmimeve dhe caktimin e masave të tjera mbrojtëse në këtë vendim”, thuhet në njoftim, transmeton Klankosova.tv. Tutje, Hajdari tha se me këtë vendim, marzha tregtare maksimale e lejuat e shitjes me shumicë është dy cent për litër dhe marzha tregtare maksimale e lejuar e shitjes me pakicë është 12 cent për litër. “Llogaritja e marzhës tregtare maksimale e lejuar për shitje me shumicë dhe pakicë  bëhet sipas nenit 4 paragrafi 1.1 dhe 1.2. të U/A Nr. 03/2022 për Rregullimin e Çmimeve të Produkteve të Naftës dhe Karburanteve të Ripërtrishme dhe Masat e Tjera Mbrojtëse.  Ky vendim hyn në fuqi një (1) ditë pas publikimit në Gazetën Zyrtare të Republikës së Kosovës”, thuhet në vendim.