Lajmet e fundit
Ekipi mbrojtës i Nasim Haradinajt ka bërë të ditur se pas aktgjykimit të apelit në rastin kundër Hysni Gucatit dhe Nasim Haradinajt, ku dënimi u ul vetëm për tre muaj, do të kërkojnë të apelojnë aktgjykimin në Kolegjin e Gjykatës Supreme të Dhomave të Specializuara.
Sipas njoftimit, përderisa Kolegji i Apelit me të drejtë e ka liruara Haradinajn nga akuza për pengim i personave zyrtarë në kryerjen e detyrave zyrtare, nuk i ka shqyrtuar mjaftueshëm arsyet e mbetura të ankesës dhe nuk i ka trajtuar siç duhet argumentet që sipas tyre, shkojnë në thelb të procesit.
“Vëmë re mendimin kundërshtues të gjyqtarit Kai Ambos, i cili përveç kësaj do ta lironte z. Haradinaj nga një akuzë e mëtejshme për pengim dhe do t'i kishte ulur dënimin me 3 muaj të tjerë. Opinioni i tij kundërshtues thekson interpretimin e larmishëm në Kolegjin e Apelit. Megjithatë, në parashtresën tonë kishte mjaft arsye thelbësore apelimi për të justifikuar, të paktën, një rigjykim”, thuhet në reagimin e ekipit mbrojtës të Haradinajt, transmeton Klankosova.tv.
Tutje, mbrojtja tha se kanë argumentuar gjerësisht se Nasim Haradinaj nuk pati një gjykim të drejtë dhe se kishte parregullsi të rënda procedurale.
“Në veçanti, ne argumentuam se prokuroria kishte dështuar të vendoste akuzat mbi provat përtej dyshimit të arsyeshëm, se kishte pasur shkelje të shumta dhe të vazhdueshme të zbulimit nga prokuroria, se dështimi për të hetuar siç duhet burimin e rrjedhjes së dokumenteve përbënte një problem serioz dështimi, dhe se ka pasur një dështim për të hetuar siç duhet ose në mënyrë adekuate pretendimet e besueshme të bllokimit ose zhvendosjen e sugjerimit se çdo veprim i ndërmarrë është bërë në interes të publikut”, thuhet më tej në reagim, përcjell Klankosova.tv.
Sipas mbrojtjes së Haradinajt, ata kanë argumentuar se gabimet e identifikuar në bazat e ankesës, kishin shkaktuar një dështim të drejtësisë në lidhje me tërësinë e dënimeve të shqiptuara dhe i vetmi mjet, sipas tyre, i drejtë ishte ndryshimi i dënimeve.
“Zvogëlimi prej tre muajsh, sipas mendimit tonë, nuk e ndreq dënimin dukshëm joproporcional të shqiptuar”, thuhet në reagimin e mbrojtjes.
Po ashtu, mbrojtja ka reaguar edhe për faktin që Kolegji i Apelit në përmbledhjen e tij iu referuar transferimit të Haradinajt në një shtet tjetër, ku do të vuante pjesën e mbetur të dënimt.
“Në pritje të ankesës në Kolegjin e Gjykatës Supreme, z. Haradinaj duhet të qëndrojë në Njësinë e Paraburgimit në Hagë dhe sa i përket çdo transferimi, zoti Haradinaj do të presë që përfundimisht të transferohet për të vuajtur çdo dënim në Republikën e Kosovës, ashtu siç duhet. kujtohet se kjo nuk është një gjykatë ndërkombëtare apo ad hoc, por një organ gjyqësor vendas”, thuhet në deklaratën për media.
