Pas tri orësh kërkime, gjendet 65-vjeçarja nga Zvicra që humbi në Prevallë

Një operacion i koordinuar kërkim-shpëtimi në malet e Prevallës përfundoi me sukses pasditen e së martës, pasi një 65-vjeçare nga Zvicra, me prejardhje nga Kosova, u gjet shëndoshë e mirë pas më shumë se tri orësh kërkime intensive.

Sipas informacioneve fillestare, gruaja kishte humbur orientimin gjatë një shëtitjeje në natyrë me familjarët e saj. Në një moment ajo ishte ndarë nga grupi dhe kishte mbetur në një pjesë të thellë të zonës malore, duke pamundësuar kontaktin me familjen.

Menjëherë pas raportimit të rastit, institucionet përgjegjëse organizuan një operacion kërkim-shpëtimi, ku u angazhuan ekipet e zjarrfikësve, Policia e Kosovës dhe zyrtarët e Parkut Kombëtar. Në aksion mori pjesë edhe drejtori i Drejtorisë për Siguri dhe Emergjenca, Sead Arifi, shkruan TV Prizreni, transmeton Klankosova.tv.

Pas më shumë se tri orësh kërkime në terrenin malor, ekipet arritën ta lokalizojnë dhe ta gjejnë 65-vjeçaren në gjendje të mirë shëndetësore. Lidhur me rrethanat e humbjes së saj, zhvillimin e operacionit të kërkim-shpëtimit dhe gjendjen në të cilën u gjet bashkatdhetarja, detaje ka dhënë komandanti i Brigadës së Zjarrfikësve në Prizren, Flamur Hoti.