Lajmet e fundit
Autoritetet greke kanë dërguar forca speciale, ekipe shpëtimi, tenda dhe dronë në ishullin e Santorinit pasi në zonë u regjistruan qindra lëkundje sizmike.
Mes frikës për një tërmet më të madh që mund të shkaktonte një cunami, njerëzit u këshilluan të shmangin vijën bregdetare dhe ndërtesat e braktisura, të zbrazin pishinat dhe të përmbahen nga grumbullimi i një numri të madh në hapësira të mbyllura.
Ministria e Mbrojtjes Civile tha se shkollat do të mbyllen si masë paraprake të hënën, shkruan Euronews.al, transmeton Klankosova.tv.
“Asgjë nuk mund të përjashtohet,” tha Kostas Papazachos, një profesor i gjeofizikës në Universitetin Aristotele të Selanikut. “Dhe kjo është arsyeja pse po merren masa paraprake, pikërisht për të kufizuar ndikimin e një tërmeti më të fortë.”
Një natë më parë, ndërsa masa të ngjashme u morën në Amorgos dhe ishujt e afërt të Ios dhe Anafi, ekipet e shpëtimit në Santorini ngritën tenda në zona të larta në fusha basketbolli dhe në parkingje makinash. Në rast të një cunami, njerëzve iu tha të shkonin në brendësi.
