Pandemia nuk i ndal rahovecianët, përkujtojnë dëshmorë në Krushën e Madhe

Në këtë kohë pandemie pothuajse të gjitha aktivitetet përkujtimore janë anuluar si masë kundër përhapjes së Covid-19. Mirëpo sot në Rahovec janë përkujtuar në 21 vjetorin e rënies dëshmorët Dalip Behra dhe Bekim Gashi nga fshati Krushë e Madhe, njofton Klan Kosova Shumë nga të pranishmit shihen se nuk janë të pajisur me masa mbrojtëse si maskë dhe doreza. Mirëpo kryetari Smajl Latifi, i cili ishe i pajisur mbajti edhe një fjalim në tubimin përkujtimor. "Dalip Behra dhe Bekim Gashi me shokë i vunë gjoksin furtunës dhe vendosën të përballen me fatin, duke besuar se e drejta është në anën tonë dhe këtë luftë duhet ta fitojmë ne". "Bijtë e Krushës së Madhe e ujitën tokën e dashur të vendlindjes me gjakun që po kjo tokë u fali. Ata e ndjenin se e kishin borxh luftën dhe rënien për liri, prandaj hynë me vendosmëri në këtë përballje. Sikur shumë shokë të tjerë dhe bashkëvendas të tyre e donin jetën, por jo jetën në robëri. Kjo i bën ata të jenë të veçantë dhe të kujtohen përherë me respekt e nderim". "Dëshmorët që po i përkujtojmë sot dhe ata që ranë gjithandej trojeve shqiptare, na e lanë në dorë pishtarin e lirisë, pishtar që djeg e përvëlon secilin që nuk e mban si duhet dhe që nuk duhet të shuhet asnjëherë. Vetëm në këtë mënyrë do ta kemi rrugën të ndriçuar, sepse dëshmorët janë pishtarë të pashuar lirie". "Jetësimi i lirisë me të gjitha të mirat e vështirësitë që ka, mbetet detyrë e çdoditshme dhe obligimi ynë i përhershëm", tha Latifi.