Pandemia e COVID-19 po ua vështirëson punën filmbërësve

Sikurse në mbarë botën ashtu edhe në Kosovë pandemia e koronavirusit ka ndikuar në anulimin dhe shtyrjen e shumë  projekteve  filmike të krijuesve të filmit në vend. Për shkak të kësaj gjendjeje, filmbërësit po ballafaqohen me vështirësi në realizimin e punës si dhe  në grumbullimin e ekipeve. Montazheri dhe producenti i filmit, Agron Vula, problem të madh po e sheh realizimin e xhirimeve të projekteve filmike të tij, numrin e  madh të  njerëzve në ekipin me të cilin punon. “Ekipi i prodhimit është ekip i madh, dhe kjo krijon vështirësi  pasi grumbullimi i 30 personave në  hapësira të mbyllura përbën edhe rrezik,  projekti ynë  që do të  jetë co-production  po varet nga pandemia dhe varësisht nga situata me pandeminë edhe do të realizohet”, tha ai për klankosova.tv. Kufizimet që erdhën si pasojë e COVID-19 bën që edhe regjisori Faton Bajraktari të planifikojë xhirimin e një projekti filmik për në muajin tetor. “Xhirimin e një projekti filmik të planifikuar për muajin qershor jam detyruar ta shtyj shkaku i pandemisë, tani po planifikoj që këtë  film ta realizojmë  gjatë muajit tetor, duke iu përmbajtur kufizimeve dhe duke patur kujdes të madh”, thotë regjisori Bajraktari. Edhe Edon Rizvanolli i cili është i angazhuar si aktor në dy filma u përball me situatë të njëjtë. “ Tani ndodhem në Malin e Zi, jam duke punuar  në një film të metrazhit të gjatë si aktor, filmi ishte planifikuar të xhirohej gjatë muajve  prill-maj, por shkaku i pandemisë është shtyrë për tani.E njëjta gjë ka ndodhur edhe me një tjetër film me një produksion gjerman ku marr pjesë si aktor edhe ai projekt është shtyer për në tetor”,  ka thënë  Rizvanolli. Regjisori Fatos Berisha  tha për klankosova.tv se ishte angazhuar në një projekt  teatral jashtë vendit gjatë periudhës së pandemisë  ai tregon për shfaqjet që u dhanë gjatë kësaj periudhe e të cilat  ishin vetëm për një numër të kufizuar të publikut. “Si regjisor, kam punuar shfaqje gjatë pandemisë në  “Teatrin Migjeni” në Shkodër, ky ishte një projekt i veçantë në këto hapisra dhe të gjitha përgatitjet e shfaqjeve u bënë gjatë pandemisë deri tek premiera e cila ishte vetëm me ftesa, me numër të kufizuar të ulsëve dhe publiku mbante maska. Por një tjetër projekt,  regjisorit Berisha i është dashur që ta shtyj dy herë brenda një periudhe të shkurtër kohore, është festivali PriFilmFest që pas shtyrjes do të mbahet në formën online. “PriFest-i është shtyer dy herë brenda këtij viti, dhe përfundimisht kemi vendosur që në muajin tetor ta mbajm vetëm online”, tregon Berisha për klankosova.tv.