Pak kohë para afatit, a do të arrijë Kurti sot marrëveshje pas disa dështimeve për presidentin?

Më pak se 24 orë kanë mbetur deri në përfundimin e afatit kushtetues për zgjedhjen e presidentit të ri të Kosovës, ndërsa ende nuk është arritur ndonjë marrëveshje politike që do të siguronte kuorumin prej të paktën 80 deputetësh në Kuvend.

Situata mbetet e bllokuar, pasi subjektet politike nuk kanë gjetur gjuhë të përbashkët për emrin që do të drejtojë shtetin.

Lëvizja Vetëvendosje doli me një ofertë të re të premten, duke kërkuar nga PDK dhe LDK që të propozojnë tre kandidatë jopartiakë, prej të cilëve më pas të zgjidhet presidenti.

Kreu i kësaj partie, dhe njëkohësisht kryeministri Albin Kurti kishte vendosur afat deri të dielën në mbrëmje për kryetarin e PDK-së Bedri Hamza dhe atë të LDK-së Lumir Abdixhiku që të paraqesin emra konkretë, por PDK refuzoi e LDK “ofertoi”.

E një natë më vonë pati shkëmbim deklaratash mes Vetëvendosjes dhe LDK-së, raporton Klankosova.tv.

Shefja e Grupit Parlamentar të LVV-së, Arbërie Nagavci, tha se ende presin propozime nga opozita, ndonëse emri i Vjosa Osmanit është në tavolinë si kandidate nga ish partia e saj LDK. E në anën tjetër, Shefja e GP-së nga LDK, Jehona Lushaku Sadriu i është përgjigjur Lëvizjes Vetëvendosje sa i përket emrit për postin e presidentit. Lushaku Sadriu ka shkruar se emri i Vjosa Osmanit është, por ka kërkuar nga VV-ja nëse i kanë 66 vota për këtë propozim. “A deshtët emra? Emrin e keni. Kallxoni a i keni 66 vota!”, ka shkruar ajo. Gjithashtu, ka qenë edhe kolegu i saj partiak, Besian Mustafa që ka pyetur nëse VV-ja i ka 66 vota për propozimin e Vjosa Osmanit për presidente. PDK, ndërkohë, ka refuzuar ofertën e Vetëvendosjes, me kryetarin Bedri Hamza që ka akuzuar pushtetin për tentim të bartjes së përgjegjësisë te opozita.

Presidenti i Kosovës zgjidhet me shumicë të kualifikuar në dy raundet e para, ose me 61 vota në raundin e tretë, por vetëm nëse në sallë janë të pranishëm të paktën 80 deputetë.

 Asnjë parti nuk e ka këtë numër vetë në Kuvendin prej 120 ulësesh, duke e bërë të domosdoshëm kompromisin politik.

Afati për zgjedhjen e presidentit përfundon më 28 prill, dhe nëse nuk arrihet marrëveshje, vendi mund të shkojë në zgjedhje të reja brenda 45 ditësh.

Aktualisht, detyrën e ushtrueses së presidentit e mban kryetarja e Kuvendit Albulena Haxhiu. /Klankosova.tv https://klankosova.tv/a-do-ta-tradhtoje-kurti-osmanin-edhe-pas-propozimit-nga-ldk-ja/