Lajmet e fundit
Opinionisti Rrahman Paçarizi tha se partitë opozitare ende janë pa qëndrim për çështjen e votimit ose jo të Vjosa Osmani për presidente.
Megjithatë, ai thotë se nuk beson se Albin Kurti me lehtësi do ta kandidojë Osmanin edhe për një mandat në krye të shtetit, meqë kjo e fundit, sipas tij, e ka krahasuar pikërisht Kurtin me Hugo Chavezin e Venezuelës.
“Partitë politike opozitare kryesisht nuk merren me punë të veta. Ata ende nuk kanë qëndrim për një çështje kaq të thjeshtë që e ngre zotëri Kurti. Nuk besoj që zotëri Kurti do ta kandidojë me lehtësi zonjën Osmani sepse ajo e ka pas krahasuar me Hugo Chavezin, dhe është ajo që nga pozita e presidentes e ka quajtur qeveri që bën bixhoz me politika ndërkombëtare. Zotëri Kurti nuk është në pozicion të ia fal atë fjalë”, u shpreh Paçarizi.
Ndërkaq, Dardan Sejdiu tha se opozita duhet të reflektojë thellësisht se çka është politika, në kohën në të cilën jemi.
Në Rubikon, ai u shpreh se diskutimi për presidentin/en është çështje e kryer.
“Sjellja e partive opozitare, nga dita e zgjedhjeve e deri më sot, e ka treguar çka po duan. Merren me të, se si do të luajë ai. Jo se si do të organizohem unë në tri-katër vjetët e ardhshme,... por merren me atë se nëse nuk e votojmë Vjosën, na çon në zgjedhje. Po, ju çon. E çka tash? Këta (opozita) janë komplet të dorëzuar. LVV më 2010 i ka pasur 12 deputetë, më 2014 16 deputetë, më 2017 32 deputetë, dhe kështu ka ardhur duke e bërë politikën poshtë, duke hyrë fshat më fshat e lagje më lagje, dhe duke e ndërtuar një tregim i cili ka pasur dy-tri lidhje interesante që qytetarët i ka bërë të kuptojnë se pse ata janë të varfër. E cili është tregimi i partive opozitare sot? S’kanë!”, deklaroi Sejdiu.
