Osmani: Gjaku i të rënëve të Likoshanit dhe Çirezit u bë thirrje për qëndresë, dinjitet dhe liri

Presidentja Vjosa Osmani, ka kujtuar 28 vjetorin e masakrës së Likoshanit dhe Çirezit nga forcat gjenocidale të Serbisë. “Më 28 shkurt 1998, regjimi gjenocidal i Serbisë kreu një nga aktet më të rënda të terrorit shtetëror në Kosovë, duke vrarë mizorisht 24 banorë të Likoshanit dhe Çirezit, prej të cilëve 20 civilë që u shndërruan në martirë e 4 dëshmorë të UÇK-së që ranë heroikisht në mbrojtje të popullatës civile”. “Kjo ishte një përpjekje brutale për ta thyer shpirtin e lirisë që po rritej në Drenicë dhe në mbarë Kosovën”. “Gjaku i të rënëve të Likoshanit dhe Çirezit u bë thirrje për qëndresë, për dinjitet dhe për liri. Ata u bënë pjesë e themelit mbi të cilin u ngrit rrugëtimi ynë drejt çlirimit dhe shtetndërtimit”, tha Osmani. Ajo shtoi se kujtimi i martirëve dhe dëshmorëve të Likoshanit dhe Çirezit është amanet për drejtësi dhe për ta ruajtur lirinë me çdo kusht. “Lavdi e përjetshme të rënëve të Likoshanit dhe Çirezit”, përfundoi presidentja Osmani.