Opozita sërish përballë Bashkisë, Policia e Shtetit me plan masash

Mbështetësit e Aleancës për Mbrojtjen e Teatrit, së bashku me opozitën e Rithemelimit do të zhvillojnë sot protestën e radhës përpara Bashkisë së Tiranës. Manifestimi do të nisë në orën 11:00 dhe pritet të kërkohet sërish dorëheqja e kryebashkiakut Erion Veliaj në lidhje me çështjen e drejtorëve të arrestuar apo për inceneratorët. Duke qenë së në protestat e mëparshme janë shënuar momente përplasje me efektivët dhe hedhje bombash molotiv, policia e shtetit ka marrë një plan masash, teksa iu bën thirrje organizatorëve për ruajtjen e qetësisë. Mes masave të policisë parashikohet dhe pezullimi i përkohshëm i qarkullimit të mjeteve pranë qendrës së qytetit. Njoftimi i policisë: Policia e Shtetit bën me dije se, ka marrë masa organizative dhe operacionale për garantimin e rendit publik dhe sigurisë gjatë zhvillimit të një tubimi të kërkuar nga “Aleanca për Mbrojtjen e Teatrit”, ditën e nesërme, më datë 14 maj 2024, ora 10:00, pranë Bashkisë së Tiranës. Në zbatim të planit të masave, Policia e Shtetit njofton se, ditën e nesërme, prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerojmë që të përdoren rrugë alternative, deri në përfundim të tubimit, si Unaza e Mesme dhe Unaza e Madhe. Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime. Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore. Policia u përsërit thirrjen organizatorëve, drejtuesve dhe pjesëmarrësve në tubime për të respektuar ligjin dhe për t’u distancuar nga çdo akt dhune.