Operacioni “mjegulla”, arrestohet edhe një i dyshuar – i gjenden gjashtë kilogramë kanabis

Policia e Kosovës ka vazhduar me operacionin policor ‘Mjegulla’, ku është arrestuar edhe një i dyshuar dhe i janë gjetur gjashtë kilogramë kanabis. Dje ishte arrestuar një person i dyshuar dhe ishin konfiskuar rreth 40 kilogramë lëndë narkotike që dyshohet të jetë marihuanë, njofton Klan Kosova. “Kurse, sot më 06.01.2023, rreth orës 09:30, kanë vazhduar kontrollet në një depo dhe objekte tjera përcjellëse në Gjakovë. Gjatë kontrollit, janë gjetur edhe rreth 6 kg e 383 gr substancë narkotike,  dyshohet të jetë marihuanë. Kurse në dy lokacione tjera në Prishtinë e Podujevë janë gjetur e konfiskuar edhe: 88 gr substancë narkotike, dyshohet të jetë kokainë, dy shishe qelqi me vaj kanabisi, një revole dhe 24 fishekë dhe dëshmi tjera relevante për rastin”. Policia ka arrestuar të dyshuarin B.B., (viti i lindjes 1983, mashkull kosovar), kurse një të dyshuar tjetër (i njohur për policinë) nuk është hasur dhe i është lënë ftesa për lajmërim në polici. I dyshuar është intervistuar dhe me aktvendim nga prokurori i njëjti dërgohet në mbajtje deri në 48 orë.

klankosova.tv