Operacion dhjetëditor: FSK-ja gjeti trupin e 30-vjeçarit të zhdukur në lumin Mat

Forca e Sigurisë së Kosovës ka njoftuar se pas një operacioni dhjetëditor kërkim-shpëtimi ka gjetur trupin e pajetë të Jurgen Karajt, të riut i cili ishte zhdukur në lumin Mat në Shqipëri. Sipas FSK-së, me kërkesë të autoriteteve shqiptare, një kontingjent i specializuar i Kërkim-Shpëtimit nga Regjimenti i Mbrojtjes Civile i Gardës Kombëtare u angazhua në zonën e Klosit për gjetjen e personit të zhdukur. "Pas angazhimit intensiv dhe bashkëpunimit të ngushtë me autoritetet shqiptare, ekipet e kërkim-shpëtimit arritën të lokalizojnë dhe të gjejnë trupin e pajetë të personit të humbur. Komandanti i FSK-së Gjenerallejtënant Bashkim Jashari, në emrin e tij personal dhe në emër të gjithë personelit të FSK-së, shpreh ngushëllimet më të sinqerta për familjen dhe të afërmit e viktimës", raporton Klankosova.tv. Njëherësh, komandanti i FSK-së ka falënderuar personelin e angazhuar për përkushtimin, profesionalizmin dhe disiplinën e treguar gjatë përmbushjes së këtij misioni. "Forca e Sigurisë së Kosovës mbetet e përkushtuar në misionin e saj humanitar dhe në forcimin e bashkëpunimit rajonal, gjithmonë në shërbim të jetës, sigurisë dhe mirëqenies së qytetarëve", shkroi FSK./Klankosova.tv https://klankosova.tv/shqiperi-29-dite-i-shpallur-i-zhdukur-gjendet-trupi-i-30-vjecarit-jurgen-karaj12/