“Once Upon a Time in Hollywood” – Letra e dashurisë së Tarantinos

Quentin Tarantino kishte premtuar që ishte duke prodhuar filmin e tij më të mirë “Once Upon a Time in Hollywood”. I gjithë filmi i tij ishte një homazh i verës së vitit 1969. Filmi tregon historinë e aktorit Rick Dalton (DiCaprio), një yll në rënie në industrinë e kinemasë dhe veteran i  TV Westerns. E vetmja gjë që e mban ende dhe e shpëton të mos prekë fundin është miqësia e tij me mikun dhe dublantin e kahershëm Cliff Booth (Pitt). “Na ishte njëherë në Hollywood” ka shumë mesazhe që ndërthuren herë me dramaticitetin e një epoke në perëndim e sipër, e herë me të qeshura në lot nëpër teatrot kur shfaqet fytyra e Leonardo DiCaprio-s duke u përlotur pothuajse nga fillimi në fund. Një gjë është e sigurt. Loja aktoriale ishte shumë lart. Pitt, DiCaprio dhe Robie janë pothuajse në kufijtë e perfeksionit. Tarantino është eklektik. Në “Once Upon a Time in Hollywood “, ai jo vetëm që bën film brenda filmit, por edhe analizon zhanre të ndryshme të kinemasë. Gjithmonë, Tarantino ka qenë një regjisor autoreferencial, shkruan Top Channel. Një pjesë e rëndësishme tjetër e tij është fakti që Tarantino është mjeshtër i faktit historik. Megjithëse ka kritika qe ai nuk i është besnik ngjarjeve të verës ‘69, pak rëndësi ka. Ai hyn në grupin e regjisorëve që mendojnë se kinemaja e bën historinë. Nuk ka pse një film fiction të jetë besnik i faktit. “The Hollywood Reporter” ishte i pari që i mëshoi asaj që vetë regjisori tha për filmin e tij; nga fillimi në fund nje letër dashurie e Tarantinos për LA. Kjo është historia e tij më personale e mundshme. Nëse Quaron i kushtoi filmin “Roma” Mexico City-t të vitit 1970, Tarantino kishte L.A. në vitin 1969. Ky ishte formimi i fortë i tij. Ishte bota e tij kur ishte vetëm gjashtë vjeç. Ishte letra e tij e dashurisë atëhere dhe tani. Dhe mbase vazhdon të jete letra e dashurisë e tre burrave (Tarantino, Pitt, DiCaprio) qe kanë qenë në majë të industrisë së Hollywood-it për çerek shekulli. Asnjë film tjetër nuk ka gjasë të jetë kaq shënjues për jetën e të treve. Tarantino është përballur me kritika për mënyrën si e trajton figurën e gruas në këtë film. Aq sa është komentuar edhe si një kundërpërgjigje e tij ndaj lëvizjes “Me Too” . Box Office regjistron 180.5 milionë $. Dyfishin e buxhetit të filmit. Ne 160 minuta mund të përcillet nje “përrallë” e shkuar. Me shumë humor. Me shumë miqësi dhe notë pozitive. Pas premirës në Festivalin e Kanës së këtij viti “Once Upon a Time in Hollywood”  është i aksesueshëm për të gjithë botën në kinema. Në Kinemanë Imperial u futa me kuriozitetin e një filmi që e pret me padurim! Sepse është Quentin Tarantino. Regjisori që filmin e ka idenë e tij, eksperiencën e tij, dhe njeriu që i ka dhënë kinemasë dozën e karaktereve klasike.