"Omicron përhapet me shpejtësi rrufeje", thotë kryeministri francez

Varianti Omicron "po përhapet me shpejtësi rrufeje" në Evropë dhe ka të ngjarë të bëhet dominues në Francë nga fillimi i vitit të ardhshëm, ka paralajmëruar kryeministri francez, Jean Castex. Ai foli të Premten, disa orë përpara se Franca të vendoste kufizime udhëtimi për ata që hynin nga Mbretëria e Bashkuar. Mbretëria e Bashkuar deri më tani ka qenë më e goditura në rajon, me afro 15,000 raste të konfirmuara të Omicron të premten. Franca mbylli kufijtë e saj për njerëzit që udhëtonin për biznes ose turizëm, me radhë të mëdha që u formuan në terminalet e Portit të Dover dhe Eurostar ndërsa njerëzit u përpoqën të hynin përpara se ndalimi të hynte në fuqi. Duke folur disa orë para hyrjes së rregullave të reja, Castex tha se kufizimet e udhëtimit ishin pjesë e një sërë masash që po merren për të frenuar valën e infeksioneve, shkruan BBC, transmeton Klankosova.tv. Ato përfshijnë shkurtimin e hendekut midis dozës së dytë dhe të tretë të vaksinës dhe kërkesën për vaksinim të plotë për të hyrë në restorante dhe transport publik në distanca të gjata. Për më tepër, të gjitha festimet zyrtare të Vitit të Ri dhe shfaqjet e fishekzjarreve janë anuluar. Castex tha gjithashtu se qeveria do të shpallë hapa të rinj për të trajtuar hezitimin për vaksinim vitin e ardhshëm, duke deklaruar se "nuk është e pranueshme që refuzimi i disa milionë francezëve për t'u vaksinuar të vë në rrezik jetën e një vendi të tërë".