OKB njofton për 798 të vrarë në Gaza që nga maji, gjatë kërkimit të ndihmave

Zyra e Komisionerit të Lartë të Kombeve të Bashkuara për të Drejtat e Njeriut (OHCHR) ka deklaruar se të paktën 798 palestinezë janë vrarë në Gaza që nga 27 maji, ndërsa përpiqeshin të merrnin ndihma ushqimore. Bëhet e ditur se nga ky numër, 615 janë vrarë pranë pikave të shpërndarjes së ndihmave të Fondacionit Humanitar të Gazës (GHF) — një strukturë e mbështetur nga SHBA-ja dhe Izraeli që është përballur me kritika të ashpra nga OKB-ja dhe organizatat humanitare për dështimin në përmbushjen e nevojave të popullsisë së Gazës. Ndërsa, sipas zëdhënësit të OHCHR, 183 të tjerë janë vrarë përgjatë rrugëve të autokolonave të ndihmave. Banorët e Gazës kanë raportuar se incidentet janë të përditshme: grupe që përpiqen të afrohen te qendrat e GHF-së shpesh qëllohen nga forcat izraelite, duke shkaktuar viktima masive. Nga ana tjetër, Izraeli akuzon Hamasin për sulme ndaj civilëve që kërkojnë ndihma dhe për manipulim të numrit të viktimave. Megjithatë, ushtria izraelite ka pranuar se “disa” civilë palestinezë janë vrarë nga trupat e saj pranë qendrave të ndihmës së GHF-së, duke njoftuar se ka lëshuar udhëzime të reja për trupat, pas “mësimeve të nxjerra” nga incidentet.