Lajmet e fundit
Organizata Botërore e Shëndetësisë ka bërë të ditur se rreth 93% e fëmijëve në botë, nën moshën 15 vjeç, thithin ajër të ndotur që vë shëndetin dhe zhvillimin e tyre në rrezik serioz.
Më shumë se nëntë në dhjetë fëmijë në botë thithin ajër toksik në baza ditore – çfarë ka rezultuar me vdekjen e rreth 600,000 fëmijëve në vitin 2016.
Në raportin e kësaj organizate thuhet se fëmijët janë më të cenueshëm ndaj efekteve të ndotjes së ajrit, pasi ata marrin frymë më shpejt se të rriturit dhe në këtë mënyrë thithin më shumë ndotës.
“Kjo është e pafalshme. Çdo fëmijë duhet të jetë në gjendje të thithë ajër të pastër, në mënyrë që të rritet dhe të përmbushë potencialin e tij të plotë”, ka deklaruar drejtori i përgjithshëm i OBSH-së, Tedros Adhanom Ghebreyesus.
Sipas raportit, 98% e fëmijëve nën moshën pesëvjeçare në vendet me të ardhura të vogla ose të mesme në Afrikë, Azi Juglindore dhe Mesdheun Lindor janë të ekspozuar ndaj ajrit të ndotur në nivele mbi udhëzimet e OBShsë, krahasuar me 52% të pesëvjeçarëve në vendet me të ardhura të mëdha.
