"Nuk mund të bëjë shantazh një parti me 22 vota", Deliu u përgjigjet akuzave për postin e presidentit (VIDEO)

Deputetja e PDK-së, Blerta Deliu, ka mohuar se partia e saj ka bërë “shantazh” për postin e presidentit/es, njofton Klankosova.tv. Ajo tha se nuk mundet një parti me 22 vota të bëjë shantazh për këtë post. “Në rrethana të tilla, nuk mund të shantazhojë dikush që i ka 22 vota. Pra, dikush që s’ka dashur të dialogojë, dikush që s’ka dashur të arrijë rezultat, dhe ka insistuar në kandidatura puro zgjatim të pushtetit të tij, z. Kurti, edhe këtë e kemi parë pastaj edhe në qëndrimet e tij të fundit, kur u bë përpjekjeje që të vendosen edhe dy emra të tjerë, ai i Glauk Konjufcës dhe Fatmire Mulaxha Kollçakut”, tha Deliu në Info Magazine të Klan Kosovës. Më herët Deliu tha se partia në pushtet, Lëvizja Vetëvendosje, nuk ka qenë e interesuar në zgjidhjen e situatës. “Për me qenë e qartë që me këtë qasje, të mungesës së bashkërendimit për të siguruar një kandidat konsensual, Kosova do të rrëshqasë drejt zgjedhjeve të reja parlamentare "Këtë tendencën për zgjedhje të reja, ose mënyrën se si është operuar pas zgjedhjeve të 28 dhjetorit, e kemi parë edhe në kohën kur ka ardhur në Kuvend buxheti i Kosovës, edhe në kohën se si janë proceduar me procedura të përshpejtuara”. "Lëvizja Vetëvendosje nuk ka qenë e interesuar për të gjetur zgjidhje, sikundër ne kemi bërë përpjekje serioze. As kemi vendosur vija të kuqe. Kemi shkuar në të gjitha takimet nga z. Kurti në përpjekjen tonë që të ofrojmë një zgjidhje politike, një herë me një kandidat konsensual që është përmendur nga familja Jashari, e që ne e kemi mbështetur me vullnetin e 22 deputetëve që do të mund të jepnin votën për familjen Jashari”. https://www.youtube.com/watch?v=MchFBLJpjys