Nuk do të ketë më kufizime për funerale në Angli

Nga 17 maji familjet dhe miqtë do të mund të vajtojnë të dashurit e tyre me një numër të pakufizuar të pranishmve në funeralet në Angli, sipas planeve të reja. Si pjesë e hapit tjetër në lehtësimin e kufizimeve, qeveria po përgatitet ta heqë kufizimin ligjor prej 30 personash një muaj më herët sesa ishte planifikuar. Kjo do të thotë se nuk është i kufizuar numri i të pranishmve në funerale për aq kohë sa mund të sigurojnë distancë të sigurt shoqërore. Dasmat nga 17 maji do të kufizohen deri në 30 persona, derisa nga qershori do të mund të mbahen me një numër të pakufizuar. Kufizimi për dasmat në Angli aktualisht është 15 persona, raporton BBC, përcjell Klan Kosova. Gjatë pandemisë shumë janë detyruar që t’i ndjekur funeralet nga shtëpia përmes transmetimeve të drejtpërdrejta, duke e bërë dhimbjen për humbjen e më të dashurve më të vështirë. Ndërsa ata që mund të merrnin pjesë në ceremoninë mortore nuk mund të përqafoheshin ose shtrëngonin duart me pjesëmarrësit e tjerë. Sekretari i Komuniteteve, Robert Jenrick, tha se njerëzit kanë bërë "sakrifica të mëdha" - askund më të dukshme sesa në kufizimet "thellësisht të dhimbshme" për funeralet. Në ceremoninë e varrimit të Princ Philip, muajin e kaluar, Mbretëresha Elizabetë u desh të ulej e vetme në kishën e Windsorit. Vetëm 30 persona, shumica prej tyre familja më e ngushtë e Princit, morën pjesë në ceremoninë ku iu dha lamtumira e fundit Dukës së Edinburgut, në përputhje me kufizimet e koronavirusit.