Nora Hasani: Është rritur dukshëm trendi i investimeve të huaja në sektorin e IT-së (VIDEO)

Drejtoresha menaxhuese e Odës Ekonomike Gjermano-Kosovare, Nora Hasani, tha se interesimi i kompanive të huaja për Kosovën është shtuar dukshëm gjatë tri viteve të fundit, veçanërisht në sektorin e teknologjisë informative. “Ky trend nuk është vetëm në sektorin e prodhimit, ose për kompanitë në këtë rast gjermane që janë në kërkim të furnitorëve, por e kemi vërejtur që ka një interesim edhe për sektorin e ICT-së, do të thotë vetëm brenda këtij viti kemi pasur delegacione të ndryshme që janë interesuar që të shohin se si mund të bashkëpunojmë me kompani lokale të sektorit të IT-së” tha Hasani në Rubikon të Klan Kosovës. Hasani tutje shtoi se kompani të mëdha të sektorit të IT-së janë të interesuara që shërbimet e tyre t’i ofrojnë nga Kosova. “Trendi i zhvillimit të këtij sektori është i dukshëm, e dimë se edhe kompanitë lokale në këtë sektor janë rritur shumë gjatë viteve të fundit, krahas kësaj është rritur edhe numri i punëtorëve në këto kompani, mirëpo ka edhe kompani gjermane të cilat janë të suksesshme në tregun ndërkombëtar dhe kanë vendosur që të veprojnë prej Kosovës dhe t’i ofrojnë shërbimet e tyre , krahas zyrave që i kanë për shembull në Gjermani, Neë York, ose vende tjera, pra jo vetëm që e kemi potencialin, por kemi edhe të rinj që mund t’i ofrojnë këto shërbime për tregun e jashtëm” tha Hasani. Drejtoresha e Odës Ekonomike Gjermano-Kosovare, shtoi se ndonëse Kosova i plotëson parakushtet për zhvillimin e IT-së edhe këtij sektori i mungon fuqia e kualifikuar punëtore, prandaj sipas saj është e nevojshme që të ndërmerren reforma në sistemin e edukimit. “E ardhmja po shkon drejt digjitalizimit, drejt të gjelbërtës, do të thotë jemi duke folur për koncepte jo vetëm ‘e-Mobolity’ dhe ‘smart housing’, jemi duke menduar për procese që shkojnë drejt digjitalizimit, duke i ditur këto trende mendoj se tash është momenti të fillojnë reforma të thella në procesin e edukimit, nëse e dimë që po shkojmë në këtë drejtim duhet të ndërmerret diçka” tha Hasani. Ky emision është mbështetur nga Fondacioni Konrad Adenauer dhe Oda Ekonomike Gjermano-Kosovare. https://www.youtube.com/watch?v=GqXOhSOVcYI