Njeriu më i pasur në botë del publikisht për herë të parë me të dashurën

Jeff Bezos dhe Lauren Sanchez janë parë duke e shijuar një darkë në qytetin e New Yorkut. Kjo është hera e parë që çifti është parë së bashku qysh prej kur lajmi për romancën e tyre u bë i ditur në muajin janar. Të dielën, 55 vjeçari, drejtori ekzekutiv i Amazon dhe 49 vjeçarja Sanchez kanë shijuar një darkë me motrën e kësaj të fundit ku kanë ngrënë pica dhe hamburgera. “Të dy, Jeff dhe Lauren, kanë qenë të fokusuar në fëmijët e tyre gjatë muajve të fundit. Çfarëdo lidhje e dashurisë u la anash për këtë arsye. Tani, kur të dy kanë arritur një marrëveshje për divorcet respektive, kanë menduar se është koha e duhur që të nisin një lidhje dashurie”, ka thënë një burim i afërt me çiftin. Në një ‘tweet’ në muajin prill, Bezos – që është njeriu më i pasur në botë me një pasuri të vlerësuar prej 137 miliardë dollar – ka njoftuar se ai dhe ish-bashkëshortja e tij MacKenzie kishin finalizuar divorcin e tyre. Bezos ka mbajtur 75 % të aksioneve të çiftit në Amazon që është 12 % e kompanisë, sipas The New York Times. Ish-çifti njoftuan për divorcin e tyre në muajin janar përmes një deklarate të përbashkët pas 25 vjetësh martesë – ata kanë katër fëmijë së bashku. Sanchez, që është një prezantuese televizive dhe pronare e një kompanie filmike, po i jep gjithashtu fund martesës së saj me bashkëshortin e saj prej 13 vjetësh, agjentin e Hollywoodit Patrick Whitesell. Ata kanë dy fëmijë së bashku derisa Sanchez ka edhe një djalë më të madh nga një lidhje e mëhershme./ Klan Kosova