Njerëzit me sytë e kaltër kanë një gjë të përbashkët

Njerëzit të cilët kanë sy ngjyrë të kaltër kanë të gjithë një gjë të përbashkët. Sipas “Science Daily”, ata janë të gjithë pasardhësit e një personi të vetëm.

Shkencëtarët në Universitetin e Copenhagen thonë se kanë arritur të zbulojnë mutacionin genetik, përgjegjës për sytë me ngjyrë të kaltër, që përllogaritet të ketë ndodhur rreth 6 – 10 mijë vite më parë.

“Dikur të gjithë kishim sy ngjyrë kafë, po një mutacion genetik që prek genin OCA2 në kromozomet tona çoi në krijimin e një “çelësi” që “fiku” aftësinë për të prodhuar sy kafë”, shpjegoi për “Science Daily”, profesori Hans Eiberg.

Ky gen është përgjegjës për proteinën që prodhon melaninën. Është kjo e fundit që i jep ngjyrë flokëve, lëkurës dhe syve, shkruan Tv Klan.

Njerëzit me sytë ngjyrë të kaltër kanë një sasi të vogël melanine në sytë e tyre dhe për shkak të kësaj shkencëtarët konkluduan se ata kanë një paraardhës të përbashkët.