Një vit u hetuan për shitje droge, shkatërrohet grupi "kriminal" në Shqipëri

Policia shqiptare në bashkëpunim me Prokurorinë e Korçës ka shkatërruar një grup të cilët dyshohet se kanë shitur drogë afër shkollave dhe në lokale nate, në këtë qytet dhe në rrethinë. Finalizimi i fazës së dytë të operacionit antidrogë të koduar “Break”, u realizua pas një hetimi njëvjeçar. “Gjatë kësaj faze: u vunë në pranga 7 shtetas, njëri prej tyre organizator i grupit; u shpall në kërkim 1 shtetas; u proceduan në gjendje të lirë 6 shtetas; u identifikua si bashkorganizator i këtij grupi dhe një shtetas aktualisht i ndaluar në Itali, për heqje të paligjshme të lirisë; pjesëtarëve të grupit iu sekuestruan sasi të lëndëve narkotike Kokainë dhe Cannabis Sativa, shuma parash që dyshohet se janë përfituar nga shitja e lëndëve narkotike, si dhe 1 peshore elektronike, 3 automjete dhe 9 celularë”, shkruan në njoftim. “Konkretisht, gjatë kësaj faze, u ekzekutua masa e sigurisë ‘Arrest në burg’, e caktuar nga Gjykata e Korçës, për veprën penale ‘Prodhimi dhe shitja e narkotikëve’, për shtetasit A. M., 39 vjeç (me rolin e organizatorit), B. Gj., 37 vjeç, K. D., 27 vjeç, M. J., 19 vjeç, M. L., 34 vjeç, S. L., 37 vjeç dhe E. H., 27 vjeç. U shpall në kërkim shtetasi P. H., 34 vjeç, me të njëjtën masë sigurie, për të njëjtën vepër penale”, thuhet tutje aty. “Gjithashtu, Gjykata ka caktuar masën e sigurisë “Arrest në burg”, për veprën penale ‘Prodhimi dhe shitja e narkotikëve’, për shtetasin K. B., 34 vjeç (me rolin e bashkorganizatorit), i cili aktualisht është i ndaluar në Itali, me të njëjtën masë sigurie për veprën penale ‘Heqja e paligjshme e lirisë’”.