Një tjetër viktimë s'u mbijeton plagëve të sulmit në Graz, vdes në spital

Numri i të vdekurve nga sulmi i sotëm në qytetin austriak të Grazit është rritur në 11, pasi një nga të plagosurit ndërroi jetë në spital.

Lajmin e raportoi agjencia austriake e lajmeve APA dhe transmetuesi publik ORF, përcjell klankosova.tv.

Agjencia AFP gjithashtu citoi një zyrtar spitali të thoshte: “Një grua ka ndërruar jetë nga plagët e marra në spital.”

Më herët, autoritetet kishin konfirmuar se mes viktimave ishin gjashtë gra dhe tre burra.

Policia beson se i dyshuari, një 21-vjeçar ish-student, ka kryer vetëvrasje në tualetin e një shkolle.

Hetimet vazhdojnë për të zbardhur motivet e sulmit dhe për të identifikuar të gjitha viktimat.