Një orë gjumë më shumë, këtë të diel akrepat kthehen prapa

Edhe pak ditë na ndajnë deri në ndryshimin e orës nga vera në dimër, teksa akrepat e saj kthehen një orë prapa. Sivjet, ndryshimi i saj do të bëhet më 26 tetor, ditën e diel, në orën 03:00 të mëngjesit, ku do të fitojmë një orë shtesë gjumë. Ora dimërore do të mbetet në fuqi deri të dielën e fundit të marsit të vitit 2026 (29 mars), atëherë kur troket edhe koha verore. Me afrimin e ndryshimit  të orës verore në atë dimërore, kryeministri spanjoll Pedro Sanchez i bëri thirrje Bashkimit Evropian që t’i japë fund përgjithmonë kësaj praktike. Në një video-mesazh të ndarë në mediat sociale, Sanchez deklaroi se kalimi i ardhshëm në kohën dimërore, i planifikuar për 26 tetor të këtij viti, nuk ka më kuptim. Ai kujtoi se Komisioni Evropian propozoi për herë të parë heqjen e ndryshimeve të orës në vitin 2018, por ende nuk është marrë një vendim përfundimtar, raporton Klankosova.tv. Ndryshimi sezonal i kohës ka qenë në fuqi në të gjithë Evropën që nga viti 1980, kur Komuniteti Ekonomik Evropian filloi të koordinonte kohën verore dhe dimërore të vendeve anëtare të saj. Në atë kohë, kjo u justifikua nga nevoja për të përdorur më shumë orët e ditës për të ulur konsumin e energjisë dhe për të harmonizuar funksionimin e tregut të përbashkët.