Komisioni Qendror i Zgjedhjeve e ka nisur procesin e numërimit të votave të kandidatëve për deputetë që janë pjesë nga vendvotimet e rregullta.
Zëdhënësi i Komisionit Qendror të Zgjedhjeve, Valmir Elezi, ka thënë se në Qendrat Komunale të Numërimit, përveç procesit të numërimit të votave për kandidatë për deputetë, do të bëhet verifikimi i votave të subjekteve politike.
Elezi tha se verifikimi i votave të subjekteve politike do të bëhet nga formularët që janë plotësuar në vendvotime pas numërimit të votave për subjekte politike.
“Ky verifikim është paraparë me aktet nënligjore që janë miratuar nga KQZ, qysh para shpalljes së datës së zgjedhjeve dhe kjo do të heq të gjitha dilemat që janë krijuar gjatë problemeve në publikimin e rezultateve preliminare për subjektet politike”.
“Fillimisht, procesi i numërimit është planifikuar të fillojë në Qendrat Komunale të Numërimit në komunat Prishtinë, Obiliq, Lipjan dhe Partesh. Procesi i numërimit në komunat e tjera parashikohet të fillojë pasi të bëhen të gjitha përgatitjet e duhura teknike dhe administrative”, tha Elezi, njofton Klankosova.tv.
Më tej, ai tha se në lidhje me numërimin e votave me kusht, votave të personave me nevoja të veçanta dhe votave nga votimi jashtë Kosovës, do të bëhet në një fazë më të vonshme në Qendrën e Numërimit dhe Rezultateve, pasi të përfundojë numërimi në Qendrat Komunale të Numërimit.
“Për numrin e votave me kusht dhe votave të personave me nevoja të veçanta, së shpejti do të kemi të dhëna për secilën komunë veç e veç. Ndërkaq, siç e kemi përmendur edhe më herët, për votimin jashtë Kosovës ishin regjistruar 104 mijë e 924 shtetas dhe sipas të dhënave preliminare, numri i votave në përfaqësitë diplomatike ku u zhvillua votimi më 8 shkurt 2025 është 15 mijë e 352”.
“Lidhur me pjesën tjetër të votimit nga jashtë Kosovës, përmes postës, në kutitë postare të KQZ-së në shtete të ndryshme janë pranuar 68 mijë e 712 pako me fletëvotime”, tha Elezi.
