Lajmet e fundit
Pasdite deri në darkë, të burgosurit në Burgun e Sigurisë së Lartë, kanë lirinë të zgjedhin aktivitetet e tyre, brenda hapësirave ku janë vendosur. Disa luajnë lojëra të ndryshme, të tjerë zgjedhin të ushqejnë trupin dhe të ushtrojnë fitnes, duke përdorur këtë kohë për t’i dhënë një ritëm më të ndryshëm ditës së tyre.
UD Drejtori i këtij institucioni korrektues në Kosovë, Rasim Selmani, tregon për MAT në Klan Kosova pse quhet Burg i Sigurisë së Lartë.
“Meqenëse është i vetmi burg i sigurisë së lartë në Kosovë e veçanta e tij është që ofron një siguri tejet të lartë për të gjithë të burgosurit që mbahen këtu, njëkohësisht ofron siguri edhe për shërbimin korrektues por edhe për publikun, për faktin se ata persona që dyshohet që kanë kry krime të rënda ose që është vërtetu që kanë kry krime të rënda, mbahen në këtë institucion të sigurisë së lartë”, thotë ai.
I pyetur se pse është siguria më e lartë në këtë shërbim korrektues sesa në të tjerët, Selmani thotë: “Infrastruktura e këtij institucioni dhe përgatitja e stafit, pajisjet teknike, të gjitha këto e bëjnë me qenë një institucion i sigurisë së lartë, e specifikisht po flas ku e kemi një staf tejet të përgatitun për t’u ballafaqu me të gjitha sfidat që mund të dalin në këtë institucion”.
“Emërtimi i tij është vendos për faktin se Shërbimi Korrektues, por edhe institucionet në përgjithësi në Kosovë, kanë dashur që ta kenë një institucion ku njerëz të cilët kanë rënë ndesh me ligjin, kanë kry krime të rënda, të kenë ku ta vuajnë dënimin, të ketë një siguri shumë më të madhe sesa në institucione të tjera”, thotë Selmani. /Klankosova.tv
