Nga 1 korriku shumë ndryshime! Këto pritet të jenë rregullat e reja në futboll

Bordi Ndërkombëtar i Shoqatës së Futbollit (IFAB) pritet të miratojë ndryshime të reja të rregullave që do të hyjnë në fuqi nga 1 korriku. Sipas gazetës spanjolle “Mundo Deportivo”, IFAB po përgatitet që në mbledhjen e përgjithshme të 28 shkurtit të miratojë disa ndryshime të rëndësishme, të cilat do të zbatohen nga sezoni 2026–2027. Masa për rritjen e shpejtësisë së lojës Për të parandaluar humbjen e kohës në rivënie anësore dhe goditje këndi, po shqyrtohet futja e një sistemi të numërimit mbrapsht dhe një rifillimi më të shpejtë të lojës. Pritet që lojtarët e zëvendësuar të kenë vetëm 10 sekonda për të dalë nga fusha. Rregulli që kërkon që lojtarët të dalin jashtë fushës për një periudhë të caktuar kohe pas marrjes së trajtimit mjekësor mund të mbetet ende në fazë testimi. Sa i përket portierëve, përveç rregullit aktual që u kërkon ta fusin topin në lojë brenda 8 sekondave, po diskutohen masa shtesë mbështetëse. Zgjerimi i protokollit VAR Përveç situatave aktuale (karton i kuq, penallti, gol dhe gabim identiteti), planifikohet që edhe përjashtimet pas kartonit të dytë të verdhë të jenë të rishikueshme nga VAR, në rast të një gabimi të qartë. Teknologji dhe pajisje për arbitrat Mund të përditësohen rregullat për aksesorët që lojtarët mund të përdorin në fushë. Po ashtu, mund të lejohet përdorimi i kamerave trupore dhe teknologjive të ngjashme nga arbitrat, të cilat janë testuar më parë në ngjarje të FIFA. Qartësimi i rregullit të “prekjes së dyfishtë” në penallti Çështja që u debatua sezonin e kaluar pas penalltisë së Julian Alvarez, do të përfshihet zyrtarisht në rregullore. Nëse ka prekje të dyfishtë të paqëllimshme dhe shënohet gol, penalltia do të përsëritet. Nëse nuk shënohet gol, do të jepet goditje indirekte (në serinë e penalltive do të konsiderohet e humbur). Nëse prekja e dyfishtë bëhet me qëllim, do të akordohet goditje indirekte. Tema të tjera në diskutim Po vlerësohet mundësia e ndryshimit të kritereve për pengimin e një rasti të qartë goli (DOGSO). Rregulli i pozicionit jashtë loje nuk do të ndryshojë; propozimi i Arsene Wenger do të diskutohet vetëm në nivel konceptual. Po ashtu do të rishikohen praktika si “vetëm kapiteni flet me arbitrin” dhe zhvillimi i teknologjisë gjysmë-automatike të offside-it. Në rend dite është edhe çështja e numrit të zëvendësimeve në ndeshjet miqësore të kombëtareve A. /Klankosova.tv