New Yorku kalon Spanjën dhe Italinë, prin me numrin e të prekurve me koronavirus

Shteti i New Yorkut tani ka më shumë raste me koronavirus se çdo vend tjetër jashtë SHBA-ve. Numri i rasteve të konfirmuara me Covid-19 u rrit për 10,000 gjatë ditës së djeshme duke e çuar numrin e të prekurve në 159,937. Kjo shifër ka bërë që New Yorku ta tejkalojë Spanjën që ka 153,000 raste dhe Italinë që ka 143,000 raste. Kina, ku edhe u shfaq virusi vitin e kaluar, ka raportuar 82,000 raste. SHBA-ja në tërësi ka regjistruar 462,000 raste dhe gati 16,500 vdekje, ndërsa në gjithë botën janë regjistruar 1,6 milionë raste me Covid-19 dhe 95,000 vdekje. Derisa New Yorku prin në botë me numrin e rasteve me koronavirus, shifra e vdekjeve prej 7000 e radhit atë pas Spanjës që ka regjistruar 15,500 vdekje dhe Italisë që mban rekordin e zi me 18,000 vdekje. Më poshtë shihni fotografitë ku shihen punëtorët me veshje speciale mbrojtëse derisa varrosin shumë arkivole në një varr masiv në New York, transmeton Klan Kosova. Pamje nga droni kanë shfaqur punëtorët që përdorin një shkallë për të zbritur në gropën e madhe ku ishin të vendosura arkivolet. Këto fotografi janë shkrepur në Ishullin Hart, jashtë Bronxit, që është përdorur për më shumë se 150 vjet nga zyrtarët e qytetit si vend për varrosje masive për personat që nuk kanë të afërm, ose familjet që nuk mund t’i përballojnë financiarisht funeralet. Kryetari i New Yorkut Bill de Blasio ka njoftuar në fillim të kësaj jave se varrezat publike të qytetit mund të përdoren për varrimet gjatë pandemisë.