Nëntë të vdekur nga të nxehtit në Evropë

Të paktën nëntë persona në Evropë kanë vdekur nga vapa e madhe këtë javë, ndërsa një valë e të nxehtit vazhdon të prekë kontinentin. Në Itali, temperaturat përvëluese deri në 38 gradë Celsius i detyruan zyrtarët të lëshojnë alarmet e kuqe në 17 qytete të mëdha, përfshirë Milanon dhe Romën, ndërsa disa rajone ndaluan punën në natyrë në pasdite. Si pasojë e të nxehtit tashmë ka vdekur edhe një punëtor. Raportimet lokale thonë se Brahim Ait El Hajjam, 47 vjeç, u rrëzua ndërsa derdhte beton në një parking makinash në periferi të Bolonjës, i cili ishte gjithashtu nën alarm të kuq. Dy burra mbi 60 vjeç vdiqën në plazhet e Sardenjës, raportoi agjencia e lajmeve ANSA, dhe në kryeqytetin e Sicilisë, Palermo, një grua 53-vjeçare vdiq të hënën pasi thuhet se i ra të fikët ndërsa ecte përgjatë një rruge. Mediat lokale thanë se ajo kishte probleme me zemrën. Rezultatet e ekzaminimeve pas vdekjes nuk janë publikuar, por valët e të nxehtit vrasin mijëra njerëz në vit në Evropë, duke i dhënë nxehtit nofkën "vrasësi i heshtur". Gjatë verës së gjatë dhe përvëluese të vitit 2022 në Evropë, më e nxehta e regjistruar ndonjëherë, 61,000 njerëz vdiqën për shkak të nxehtësisë, zbuloi një studim, shkruan Skynews, transmeton Klankosova.tv. Në Spanjë, temperaturat e ashpra janë rritur edhe më shumë, duke arritur në 46°C në Huelva të shtunën dhe 37.9°C në Barcelonë dje, ku zyrtarët po hetojnë gjithashtu nëse vdekja e një pastruesi rrugësh në fundjavë ishte e lidhur me nxehtësinë. Autoritetet raportuan gjithashtu vdekje të lidhura me valën e të nxehtit në Extremadura dhe Cordoba. Ministri i energjisë i Francës raportoi dy vdekje nga të nxehtit, dhe 300 të tjerë u dërguan në spital. Kryeqyteti i saj mund të përjetojë përsëri nxehtësi 40°C sot, dhe maja e Kullës Eiffel mbetet e mbyllur, si dhe qindra shkolla. Ndërkohë, në Gjermani, zjarrfikësit u përballën me disa zjarre pyjore në shtetet lindore të Brandenburgut dhe Saksonisë mes temperaturave 40°C në disa zona.