Në Parkun Arkeologjik "Ulpiana" zbulohet një mbishkrim i dedikuar Perandorit Justinian dhe Perandoreshës Theodora

Zyra e Bashkimit Evropian në Kosovë ka bërë të ditur se Misioni Evropian Arkeologjik në Kosovë, i mbështetur nga BE-ja, ka bërë një tjetër zbulim të rëndësishëm: një mbishkrim që lidh Parkun Arkeologjik "Ulpiana" me Iustiniana Secunda. Në njoftimin e lëshuar për media thuhet se ky mbishkrim i dytë, i dedikuar Perandorit Justinian dhe Perandoreshës Theodora, shënon ndërtimin e bazilikës episkopale, transmeton Klankosova.tv. “Së bashku me mbishkrimin e parë, i cili njoftonte themelimin e Iustiniana Secunda si Qyteti i Dardanisë, këto janë të vetmet dedikime të njohura nga Justiniani në rajonin e tij të lindjes”, thuhet në njoftim. Zyra e BE-së shton se gjatë vizitës së saj në vendngjarje, Eva Palatova, ushtruese e detyrës së shefes së Zyrës së BE-së në Kosovë, përgëzoi profesor Christophe J. Goddard dhe ekipin e tij për punën e pandërprerë dhe këtë zbulim të jashtëzakonshëm. Bashkimi Evropian deklaron se është krenar që mbështet Kosovën në mbrojtjen dhe studimin e trashëgimisë së saj kulturore. /Klankosova.tv