Në Londër, Rexhep Hoti konsideron se diaspora duhet të jetë pjesë e Programit Nacional Për Rininë

''Jam shumë i lumtur që para jush po prezantoj një program për rininë dhe një program që brenda tij parasheh edhe pjesëmarrjen e diasporës. I kemi përfshirë edhe nxënësit tuaj në program sepse mërgata ka një rëndësi të veçantë për vendin, sepse ju jeni pjesë e pandashme e atdheut. Nëpërmjet këtij programi presim që të rinjtë shqiptarë që jetojnë në Angli të vijnë në Kosovë për të garuar me bashkëmoshatarët e tyre. Ky program do t’u mundësojë atyre një komunikim më intenziv dhe atraktiv me atdheun në të gjitha garat që ata do të marrin pjesë''. Koordinatori Hoti, më tej ka shtuar se Kosova e ka për obligim dhe është duke punuar në atë drejtim që diasporën të mbetet pjesë e pandashme e saj. Tutje ai u premtoi shoqatave se do t'ua sjellë të përkthyera testet edhe në gjuhët në të cilat nxënësit e mërgatës e zhvillojnë mësimin, njofton Klan Kosova. E përfaqësuesit e shoqatave shqiptare që veprojnë në Londër duke përgëzuar Koordinatorin Hoti për Programin, u shprehën të lumtur që fëmijët e diasporës do të përfshihen në Programin Nacional për Rininë. Ata theksuan se diaspora ka shumë talentë të cilët kanë nevojë për t’u nxitur për të marrë pjesë në gara dhe për ta dëshmuar veten, si dhe u shprehën të gatshëm që të ndihmojnë në implementimin e programit, njofton Klan Kosova.