Në disa vende të botës 19 marsi shënohet si Dita e Babait

Në vende të ndryshme të botës ka data të ndryshme kur festohet Dita e Babait. Dita e Babait është një festë e nderimit të atësisë dhe lidhjeve atërore, si dhe ndikimit të baballarëve në shoqëri. Festa e babait është tradicionale në vendet katolike dhe lidhet me figurën e Shën Jozefit, babait të Jezusit, me qëllim për të prezantuar më së miri figurën e tij si një pikë referimi në familje, transmeton Klankosova.tv. Shënimi i kësaj dite ka nisur që nga viti 1300 që data 19 mars të shërbejë për të kujtuar vdekjen e Shën Jozefit, ndërsa me ardhjen e Papa Sisto IV, në vitin 1479, kjo datë hyri zyrtarisht në kalendar për të kujtuar të gjithë baballarët, kurajon dhe vendosmërinë e tyre për të çuar përpara familjen. Në Shtetet e Bashkuara të Amerikës, Dita e Babait u themelua nga Sonora Smart Dodd, dhe u festua të dielën e tretë të qershorit për herë të parë në vitin 1910. Dita mbahet në data të ndryshme në mbarë botën, dhe rajone të ndryshme ruajnë traditat e tyre të nderimit të atësisë. Dita e Babait është një festë publike e njohur në Lituani dhe disa pjesë të Spanjës dhe u konsiderua si e tillë në Itali deri në vitin 1977. Kjo ditë është një festë kombëtare në Estoni, Samoa dhe në Korenë e Jugut, ku festohet si Dita e Prindërve. Festa plotëson festime të ngjashme duke nderuar anëtarët e familjes, si Dita e Nënës, Dita e Vëllezërve dhe e Gjyshërve. Këtu mund të gjeni datat se kur shtete të ndryshme të botës shënojnë Ditën e Babait.