Ndërtoi urë para banesës së motrës, ish-drejtuesja e Bashkisë në Tropojë përfundon në SPAK

Prokuroria e Posaçme Kundër Korrupsionit dhe Krimit të Organizuar (SPAK) e ka marrë në pyetje ish-kryetaren e komanduar të Bashkisë së Tropojës, Zyra Islamaj, nën akuzën e shpërdorimit të detyrës dhe abuzimit me fondet publike. Hetimet janë hapur pas ndërtimit të një ure në fshatin Luzhë, e cila, sipas SPAK, është ndërtuar jo për interesin publik, por për përfitime personale të Islamajt dhe familjarëve të saj, duke përdorur paratë e bashkisë për të shërbyer një qëllim privat. Tenderi për ndërtimin e urës u fitua nga ndërtuesi Rrok Gega, i cili gjithashtu është marrë i pandehur në këtë çështje, raportojnë mediat shqiptare. Sipas hetimeve, Islamaj ka kërkuar që ura të ndërtohej në një vend specifik pranë banesës së motrës së saj duke e personalizuar projektin për t’i shërbyer familjarëve dhe jo komunitetit. Kjo përbën një shkelje flagrante të ligjit për prokurimet publike dhe një përdorim të qartë të pushtetit për qëllime private./ Klankosova.tv