Ndalohet për 48 orë i dyshuari për aksidentin në Qyshk, dyshohet se është zyrtar policor

I dyshuari për shkaktimin e aksidentit në Qyshk të Pejës pasditen e sotme, është ndaluar për 48 orë. Kështu ka konfirmuar për Klankosova.tv, Shkodran Nikçi, zëdhënës i Prokurorisë Themelore të Pejës. “Prokurori i shtetit, bashkë me Inspektoratin Policor, ka dalë në vend të ngjarjes. Lidhur me këtë rast janë duke u ndërmarrë të gjitha veprimet e nevojshme hetimore. Personi i dyshuar me urdhër të Prokurorit të Shtetit është ndaluar për 48 orë për veprën penale ‘Rrezikimi i trafikut publik’”, ka thënë Nikçi për Klankosova.tv. Ndërkaq, Klani mëson se i dyshuari për shkaktimin e këtij aksidenti është zyrtari policor Argjend Kastrati, i angazhuar me detyrë në Stacionin Policor të Pejës. Po ashtu, është raportuar nga disa media se e aksidentuara ka vdekur, por ky lajm është demantuar edhe nga Policia e edhe nga burime të Klanit brenda QKUK-së. /Klankosova.tv