Ndahet nga jetë këngëtarja e muzikës popullore

Ndahet nga jeta në moshën 82 ­vjeçare këngëtarja e muzikës popullore, Naile Hoxha. Ajo ka ndërruar jetë sot në azilin e qytetit të Shkodrës, ku kaloi edhe ditët e fundit të jetës, duke lënë pas një karrierë të pasur artistike dhe një vend bosh, në plejadën e atyre artistëve që ky qytet nxori ndër vite, raporton “Ora”. Me një zë melodioz, përherë me buzëqeshjen karakteristike në fytyrën e saj, ajo ishte një nga këngëtaret më të suksesshme dhe më të dashura për publikun, interpretuese e dhjetëra këngëve që në moshën 13­vjeçare kur hodhi hapat e parë të karrierës, për t’u pasuar më pas në Radio Shkodra, e kompeticione të rëndësishme kombëtare. “Xhamadanin kuq si gjaku”, “Moj e mir synin larush”, “Djal i dashtun”, “Seç po fryn fllad pranvere”, etj., janë vetëm disa nga këngët që ajo këndoi plot pasion, duke prekur edhe skenat jashtë Shqipërie. Naile Hoxha ishte pjesë e Ansamblit të Këngëve dhe Valleve Popullore dhe një ndër këngëtaret e preferuara të regjimit të asaj kohe. Ajo iku duke lënë pas një repertor të pasur dhe një origjinalitet në muzikën popullore qytetare.