Naser Hafizit i vazhdohet paraburgimi për dy muaj, Izedin Bytyqit arresti shtëpiak edhe për një muaj

Gjykata Themelore në Prishtinë ka vendosur që t'ia vazhdojë masën paraburgimit edhe për dy muaj ushtruesit të detyrës së drejtorit të Autoritetit Rajonal të Pellgjeve Lumore në ministrinë e Mjedisit, Planifikimit Hapësinor dhe Infrastrukturës, Naser Hafizit. Ndërsa ndaj zëvendëssekretarit të MMPHI-së, Izedin Bytyqit, gjykata ka aprovuar kërkesën e Speciales për vazhdim të arrestit shtëpiak edhe për një muaj. Këtë për Klankosova.tv, e konfirmoi zëdhënësja e Gjykatës Themelore në Prishtinë, Mirlinda Gashi. Bytyqi dyshohet për “Keqpërdorim të detyrës zyrtare” dhe “Armëmbajtje pa leje”, kurse Hafizi për “Keqpërdorim të detyrës zyrtare”, “Shpëlarje të parave” dhe “Mosraportim apo raportim të rremë të pasurisë të të ardhurave, dhuratave, dobisë tjetër pasurore ose i detyrimeve financiare”. Vërejtje: Personat e përmendur në këtë artikull, sipas ligjeve të Republikës së Kosovës, konsiderohen të pafajshëm deri në vendimin e formës së prerë nga gjykata.