Mustafa: Doni të ardhme të Kosovës, apo qeveri të VV-së? Këto të dyja nuk shkojnë bashkë

Në konferencën e përditshme të LDK-së, kandidati për deputet, Besian Mustafa u bëri një pyetje qytetarëve. “Si do donit të duket Kosova pas katër vjetësh?”, ishte pyetja e Mustafës, i cili shtoi se nëse qytetarët duan të ardhme për fëmijët e tyre, dhe zhvillim ekonomik, arsimor në shëndetësi, duhet të votohet Lidhja Demokratike e Kosovës, transmeton Klankosova.tv. Ai thotë se nëse duan të ardhme të Kosovës, por duan një qeveri të Vetëvendosjes, këto të dyja sipas Mustafës, nuk shkojnë bashkë. “Tani që po shkojmë drejt ditëve të fundit para zgjedhjeve, mendoni se si do të dëshironit të duket Kosova pas katër vjetësh. E izoluar, e fundit në Evropë në ekonomi, arsim e shëndetësi, e varfër, me fëmijët tuaj që largohen për të kërkuar shpresë në shtetet e largëta, apo dëshironi të ardhmen që ofron LDK në krye me Lumirin. Një ardhme ku kosovarët mund të zhvillohen me investime të larta të huaja, me 1.5 miliard euro të investuara vetëm në Prishtinë, me mësim tërëditor në shkolla anë e mbanë Kosovës, me projekte kapitale që zgjidhin sfidat tuaja, dhe më e rëndësishmja me udhëheqës që me të vërtetë kujdesen për ju, për qytetarët tanë, për popullin tonë”, tha ai. “LDK ka programin e duhur, dhe ka aftësinë për të ofruar ndryshime të prekshme. Kjo është zgjidhja që duhet ta bëni tani. Dëshironi një të ardhme për Kosovën, apo doni një qeveri të VV-së? Këto të dyja nuk shkojnë bashkë. Askush nuk mund të rri në shtëpi në ditën e zgjedhjeve. Askush nuk mund të rrini neutral drejt të ardhmes të fëmijëve tuaj. Nëse ju intereson Kosova dhe e ardhmja juaj, dilni dhe votoni LDK-në. Votoni 124”.