Mujku nga Haga: Kërkesa për 45 vjet burg mbështetet në mbi 5 mijë dosje e 25 mijë faqe transkripte

Gazetarja e Klan Kosovës, Rina Mujku, e cila po përcjell nga afër gjykimin e ish-krerëve të UÇK-së, ka raportuar për zhvillimet më të fundit në Hagë, ku sot është dita e dytë e fjalëve përfundimtare. Në një lidhje direkte për emisionin “Kosova Today”, Mujku foli rreth deklarimit të sotëm të kryeprokurores Kimberly West, dhe fjalës përfundimtare që deklaroi ajo në gjykatë, transmeton Klankosova.tv. “Kimberly West, sikurse ka bërë gjatë dirës së djeshme, ka marr fjalën edhe sot, në fund të deklaratave përfundimtare të ZPS-së, mirëpo sot nuk e ka specifikuar saktë numrin e 45 vjetët që i do krerët e Ushtrisë Çlirimtare të Kosovës të dënuar, mirëpo ka treguar se sa krenare është për punën e saj në Zyrën e Prokurorit të Specializuar, dhe ka thënë se është privilegji më i madh i jetës që shumë viktima dhe dëshmitarë i kanë besuar zyrës së saj”, tha Mujku. “[Ajo] ka potencuar se vetëm transkripte të dëshmitarëve që filluan më 11 prill të vitit 2023, vetëm një javë pasi kishte filluar gjykimi dhe ishin dhënë fjalët hyrëse më 3 prill, deri më 15 prill të vitit 2025 kur e ka përmbyllur rastin e saj në Zyrat e Prokurorit të Specializuar, së bashku me dy dëshmitarët e mbrojtësit të viktimave dhe shtatë dëshmitarët e thirrur nga mbrojtja e Hashim Thaçit, plot 104 persona janë paraqitur në Dhomat e Specializuara, qoftë fizikisht, qoftë me videolidhje, për të dhënë dëshmitë e tyre në këtë rast, dhe po ashtu nga gjithë këto dëshmi janë mbledhur plot 25 mijë e 865 faqe transkripta, e mbi 5000 dosje ne të cilat Prokuroria e mbështet këtë kërkesë të saj, për t’i dënuar me nga 45 vjet krerët e UÇK-së”, u shpreh gazetarja. Siç thekson Mujku, Prokuroria kërkon këtë dënim të madh për faktin se bëhet fjalë për dhjetë akuza të ndryshme, krime lufte dhe krime kundër njerëzimit. https://www.youtube.com/watch?v=Qnkc-xcF08s