MPJ: Policëve të kidnapuar s’po u jepet bukë e ujë

Shefi i stafit në Ministrinë e Punëve të Jashtme të Kosovës, Sharr Jakupi, po thotë se policët e kidnapuar nga forcat serbe, po keqtrajtohen në Serbi. Jakupi me anë të një postimi në llogarinë Twitter, ka shkruar se policët janë duke u privuar nga ushqimi, teksa njëri prej tyre i cili ka nevojë për trajtim mjekësor, është duke u neglizhuar siç tha ai nga autoritetet serbe, transmeton Klankosova.tv. “Raporte thellësisht shqetësuese në lidhje me trajtimin e tmerrshëm të tre policëve tanë të rrëmbyer me forcë nga Republika e Kosovës, aktualisht të ndaluar në Kralevë”, shkroi Jakupi. “Pavarësisht se u është zgjatur 30 ditë paraburgimi për akuzën e 'armëmbajtjes pa leje', krimi i vërtetë janë kushtet e turpshme që po përballojnë”. “Të privuar nga ushqimi dhe uji, oficerët i janë nënshtruar një trajtimi krejtësisht çnjerëzor”. “Një oficer, në nevojë të dëshpëruar për kujdes mjekësor, është lënë pas dore, duke iu dhënë vetëm një injeksion që nga ndalimi i tij”.