Moderatori Alaudin Hamiti jep ekskluzivisht detaje: Ja pse Liberta dhe Yllka nuk janë më pjesë e formatit Big Brother VIP

Moderatori i njohur, Alaudin Hamiti, u ka dhënë fund thashethemeve, duke konfirmuar largimin e bashkëshortes së tij, Yllka Sedllari – Hamitit, nga projekti i Big Brother VIP Kosova.

Veç saj, Hamiti, ka konfirmuar se edhe moderatorja e njohur Liberta Spahiu, nuk është më pjesë e edicionit të tretë të këtij spektakti, dhe sipas tij, vendimi ishte marrë që gjatë sezonit të dytë, por kjo nuk ishte bërë publike deri tani.

''Gjatë edicionit të kaluar, Yllka dhe Liberta e bënë të qartë që ai do të ishte edicioni i fundit për to'', tha Hamiti, duke shtuar se ky vendim ishte i njohur vetëm brenda qarqeve të ngushta, transmeton klankosova.tv.

Hamiti shpjegoi se Yllka ka një qasje të veçantë ndaj publikut dhe vëmendjes mediatike, prandaj edhe kanë lindur thashetheme të shumta.

''Yllka nuk është person që dëshiron të jetë në qendër të vëmendjes ose të dalë në media. Ajo e do punën dhe e kryen me përkushtim, por nuk e tërheq drita e televizionit'', tha ai, duke theksuar se gjatë dy edicioneve të kaluara, ajo nuk ka bërë asnjë paraqitje publike apo intervistë dhe nuk ka ndarë asnjë foto nga aktivitetet e saj në Big Brother VIP Kosova.

Duke folur për kontributin e Yllkës dhe Libertës në spektakël, Hamiti theksoi se ato kanë ndihmuar në vendosjen e programit në një rrugë të qëndrueshme.

''Në vitin e parë, kishte shumë gjykime dhe paragjykime mbi spektaklin. Por, në sezonin e dytë Big Brother VIP Kosova krijoi një identitet të fuqishëm që u përqafua nga publiku jo vetëm në Kosovë, por edhe në Shqipëri dhe në diasporë'', tha ai.

Tani që Yllka dhe Liberta po përqendrohen në projekte të tjera dhe bizneset e tyre, Hamiti vlerësoi punën dhe ndikimin që ato ofruan në zhvillimin e formatit.

''Ato kanë kryer misionin e tyre dhe kanë lënë një trashëgimi të rëndësishme për formatin. Rruga tashmë është shtruar dhe është koha për sfida të reja'', përfundoi ai.

Spektakli i Big Brother VIP Kosova pritet të vazhdojë me ndryshime të reja dhe surpriza në edicionin e tretë, duke ruajtur standardin e lartë të audiencës që ka arritur në edicionet e mëparshme.