MKRS: “Harvest” përpjekja e radhës e Serbisë për të deformuar historinë përmes filmit

Ministria për Kulturë, Rini dhe Sport e Kosovës vlerëson se politika serbe po ndërton narracion të urrejtjes ndëretnike dhe po vazhdon me nxitje të konfliktit përmes filmit e instrumenteve tjera të kulturës, të cilat në kushte normale do të duhet të ishin në funksion të demokracisë e bashkëjetesës. Sipas MKRS-së, bazuar në raportimet e mediave serbe, kanë filluar xhirimet e filmit "Harvest" i mbështetur financiarisht nga shteti serb e i cili lidhet me "Shtëpinë e Verdhë" në Shqipëri ku serbët pretendojnë që është kryer trafikim organesh nga Ushtria Çlirimtare e Kosovës, pretendime fiktive dhe shpifje që nuk u vërtetuan asnjëherë nga autoritetet ndërkombëtare, raporton Klan Kosova. “Ky nuk është filmi i parë me propagandë të Serbisë. Ngjashëm ishte realizuar edhe filmi dokumentar me metrazh të gjatë ‘Shtëpia e Verdhë’ i autores Slagjana Zariq. Tentativat e tyre të vazhdueshme për të deformuar realitetin, si në rastin e filmit "Harvest", duhet të alarmojnë autoritetet relevante dhe bashkësinë ndërkombëtare”, thotë MKRS-ja. “E trishtë dhe e papranueshme të shohim se një mjet kulturor si filmi po keqpërdoret për të shpërndarë propagandë. Por, përtej tentativave për të rishkruar historinë përmes kinematografisë, e vërteta triumfon gjithmonë në sfidë me propagandën”, thuhet tutje në komunikatën e MKRS-së.