Minatorët pa paga që dy muaj, Bordi i Trepçës: Po punojmë intensivisht për t'i tejkaluar vështirësitë

Udhëheqja e ndërmarrjes ‘Trepça’ po punon intensivisht për të tejkaluar vështirësitë financiare, në mënyrë që punëtorët t'i marrin pagat dhe minatorët t’i kthehen punës në minierën me flotacion Trepça-Stan Tërg. “Bordi Mbikëqyrës i cili ka marrë detyrën këtë muaj, po punon ngushtë me menaxhmentin për të zbatuar një plan veprimi emergjent dhe po zhvillon komunikim të vazhdueshëm me aksionarët-Qeverinë e Republikës së Kosovës dhe punëtorët, për të mundësuar një zgjidhje të qëndrueshme dhe afatgjate”, thuhet në njoftimin e kësaj ndërmarrje transmeton Klankosova.tv Tutje në njoftim thuhet se "Bordi Mbikëqyrës ka treguar përkushtimin e vet, duke takuar organizatën dhe përfaqësuesit e punëtorëve që në marrje të detyrës dhe duke i njoftuar në vazhdimësi për planin dhe veprimet e shpejta që priten të merren". "Udhëheqja e ndërmarrjes e kupton rëndësinë e kërkesës së minatorëve dhe po punon me përkushtimin më të lartë për t’u dhënë përgjigjen e duhur, për të rifilluar punën e minierës me flotacion Trepça-Stan Tërg dhe për të stabilizuar operimet e ndërmarrjes. Vërejmë se gjendja financiare është rënduar nga performanca e ultë e prodhimit, humbjet dhe borxhet e grumbulluara. Tejkalimi i situatës kërkon reforma të menjëhershme që sjellin stabilitet operativ dhe financiar", thuhet ndër të tjera në komunikatën për media të Sh.A "Trepça". Ndryshe, minatorët e Trepçës, kanë që dy muaj pa i marrë pagat e tyre. Kështu deklaroi të hënën në Info Magazine të Klan Kosovës, Ibrahim Jonuzi, kryetar i sindikatës të kësaj ndërmarrje. "Minatorët tash thuajse dy muaj nuk i kanë marrë pagat e as shujtat ushqimore, mirëpo është shqetësuese kjo gjendje, se si Qeveria e Kosovës po heziton dhe ka ndërprerë pothuajse gjithë komunikimin dhe nuk po shohim ndonjë zgjidhje. Nuk është bërë ndonjë hapësirë për të dalur nga kjo situatë, e për neve është shumë shqetësuese", tha Jonuzi.