Miliardat e diasporës gati krejt në konsum e banesa, kërkohet ndërhyrje nga shteti (VIDEO)

Milionat e parave që vijnë kryesisht prej Perëndimit, nga kosovarët rezidentë shpenzohen në masën më të madhe për blerje të mallrave të konsumit ditor por edhe shërbime. Përveç kësaj një pjesë shkon në blerje të patundshmërive – shtëpi e banesa. Por shumica prej tyre janë bosh. Në afërsisht 300 mijë shtëpi apo njësi banesore nuk jeton askush. Duke qenë kështu ekonomistët kanë vërejtje por dhe kërkesa për institucionet qendrore shtetërore. “Duhet të punohet më shumë me diasporën, duke e pasë parasysh  që diaspora përpos parave që kanë ata kanë edhe biznese jashtëzakonisht të suksesshme në vendet nga vijnë dhe për këtë arsye duhet të punohet më shumë me qëllim që këto para të shkojnë të investime”, thotë për MAT, Fehmi Mehmeti, ish-guvernator i Bankës Qendrore të Kosovës. “Këtu qeveria duhet të krijojë një frymë më të mirë, apo t’i kanalizojë investimet e diasporës që mos të jenë në patundshmëri, kapital i vdekur, por të ketë investim ku kapitali mund të kthehet mund të shtohet dhe të jetë vlerë e shtuar për gjithë shoqërinë kosovare”, thotë Kapllan Halimi.