Meshkujt gjermanë mund të mos udhëtojnë pa miratim ushtarak mbi 3 muaj

Meshkujt gjermanë të moshës 17 deri në 45 vjeç mund të kenë nevojë të marrin miratim nga ushtria nëse duan të largohen nga vendi për më shumë se tre muaj, sipas ndryshimeve të fundit në ligj. Një zëdhënës i Ministrisë së Mbrojtjes ka konfirmuar se miratimi pritet të jepet, për sa kohë shërbimi në forcat gjermane mbetet vullnetar. Kjo vjen në një kohë kur vendi po synon të rrisë kapacitetet ushtarake, me stimuj të rinj për t’u bashkuar në ushtri dhe diskutime për rikthimin e shërbimit të detyrueshëm, raporton Sky News, transmeton Klankosova.tv. Një ndryshim në ligj për të rikthyer shërbimin ushtarak vullnetar u bë në fund të vitit 2025. Megjithatë, së fundmi, media gjermane “Frankfurter Rundschau” vuri re një ndryshim tjetër në ligjin gjerman për shërbimin ushtarak (Wehrpflichtgesetz – WPflG), i cili daton nga periudha e Luftës së Ftohtë. Ky ndryshim nënkupton se “meshkujt duhet të marrin leje nga qendra përkatëse e karrierës së Bundeswehr-it (forcat e armatosura gjermane) pasi të mbushin 17 vjeç, nëse dëshirojnë të largohen nga Gjermania për më shumë se tre muaj”. Më parë, kjo zbatohej vetëm në raste tensioni apo mbrojtjeje. Tani ligji është ndryshuar që të vlejë në çdo kohë, për meshkuj deri në moshën 45 vjeç. Shërbimi i detyrueshëm ushtarak në Gjermani u pezullua në vitin 2011, por lufta në Ukrainë dhe pasiguria globale kanë nxitur diskutime për rikthimin e tij nga vullnetar në të detyrueshëm. Ministria gjermane e Mbrojtjes ka bërë të ditur se ky sistem ekzistonte edhe gjatë Luftës së Ftohtë dhe “nuk ka rëndësi praktike, në veçanti nuk parashikon ndëshkime”. Sipas tyre, kjo masë synon të përdoret vetëm në raste emergjente, pasi ushtria duhet të dijë se kush mund të qëndrojë jashtë vendit për një periudhë të gjatë./Klankosova.tv