Mehmeti: Rritja ekonomike këtë vit 4%, deri në tetor diaspora dërgoi 1 miliard euro remitenca

Guvernatori i Bankës Qendrore të Kosovës (BQK), Fehmi Mehmeti, ka njoftuar se diaspora ka dërguar në Kosovë rreth një miliard euro remitenca deri në tetor të këtij viti, e që krahasuar me vitin e kaluar paraqet një rritje prej 5.5 për qind. Mehmeti po ashtu njoftoi se rritja ekonomike për këtë vit shkon deri në katër për qind. Në konferencën e fundit për këtë vit, Mehmeti tha se ekonomia e Kosovës e filloi vitin 2022 me një perspektivë të mirë dhe se sipas vlerësimeve të Agjencisë së Statistikave të Kosovës, norma reale e rritjes së Bruto Produktit Vendor në vitin 2021 ishte 10.75 për qind. Megjithatë, ai tha se gjatë vitit 2022, ndryshimi i dinamikave globale si pasojë e luftës në Ukrainë, që u shoqëruan me rritje të inflacionit, u reflektua edhe në aktivitetin ekonomik në Kosovë, raporton Ekonomia Online. “Sipas vlerësimeve të BQK-së, BPV-ja në 2022 pritet të shënojë rritje të ngadalësuar prej 3 deri në 4 për qind, kryesisht për shkak të tkurrjes së kërkesës së brendshme dhe rritjes së importit, ndërsa eksportet kanë ndikuar pozitivisht. Po ashtu, viti 2022 shënoi një ritëm më të shpejte të rritjes edhe për remitencat e dërguara nga diaspora në Kosovë. Vlera e remitencave të pranuara deri në fund të muajit tetor 2022 është 1 miliard euro, që paraqet rritje vjetore prej 5.5 për qind. Bazuar në të dhënat e regjistruara deri në shtator të këtij viti, shpenzimet e jorezidentëve në Kosovë, pjesa më e madhe e të cilave janë nga diaspora, ishin në shumë prej 1.48 miliard euro, e cila paraqet një rritje prej 26.1 për qind në krahasim me periudhën e njëjtë të vitit të kaluar”, tha Mehmeti, transmeton Klankosova.tv.